ДИРЕКТОР, ЯК СЦЕ…

     - Розгварка хтору зме водзели зоз директором нашей школи Хома Янком -

  1.  У цеку ище єден школски рок. Як бисце у пар словох прекоментаровали його цек?

     - И у тим школским року, як и у претходним, було велї проблеми. И того року було проблематичне зогриванє, плаци просвитних роботнїкох, материялни стан школи… Рачуни ше нагромадзую… Чежки бул и тот рок.

2. Тото цо сом ше вам давно сцел питац, а верим и векшина моїх товаришох, то кеди будзе оспособене озвученє ушколи. Чи у септембру школярох дочека музика на одпочивкох, чи и далєй буду слухац галайк основцох?

    - Нєшка. По учальньох нє будзе озвученє, алє у конку на поверху, нєшка (7.03.) ше успостави. На каждим вельким одпочивку школяре годни слухац музику, вистки, информациї о збуваньох у оддзелєньох, информациї о змаганьох, резултатох, Домияди… Музику буду пущац II1  и Орсаґ Иґор, а до тей роботи ше можу уключиц и други школяре. А о детальох програми мало ше зна, то препущуєм школяром.

3. Цо думаце о терашнєй ґенерациї матурантох? Поровнайце ю зоз претходнима.

   - Як и шицки претходни… З рока на рок приходза вше слабши школяре, єст школярох хтори наисце вредни и   мудри, алє єст и матурантох хтори би нїґда нє були матуранти кед би нє було тото цо було.

4. Тих дньох по школи чуц рижни приповедки о вибору нового директора, а и о Вас, як професорови -коментар?

   - Ниа, як цо школяре знаю, закончує ше мой директорски стаж. Од шлїдуюцого року лєбо будзем у  настави, лєбо у интернату, алє ище нє знам. За мойо место будзе росписани конкурс. Ґеоґрафию любим. Зоз дзецми любим робиц, то ми задовольство. Претходни даскельо роки сотрудзовали зме зоз школярами и їх наставнїками зоз Словацкей и любел бим же би ше тото сотруднїцство и надалєй пестовало.

5. И за конєц кратки коментар о “Time-out-a”, о редакциї школярох хтора ше вше намагала же би презентовала цо школяре робя у нашей школи, з чим ше занїмаю у шлєбодним чаше.

   - Похвалєл бим їх роботу. Алє школяре треба же би були уключени и до других секцийох, у хторих би ше указали у найлєпшим шветлє. Алє, знова ше врацаме на тото нашо, таки часи. Нє були найлєпши условиє за роботу. “Time-out” почал виходзиц кед я почал буц директор и його реализованє сом чежко уклапал до школских финансийох. Екипу професорох и шкплярох хтора оможлївела виходзенє того часопису, похвалєл бим и наздавам ше же тот школски часопис будзе виходзиц и шлїдуюцих рокох.

     Редакция “Time-out-a”,  Вам щиро дзекує на потримовки и сотруднїцстве и жада Вам вельо успиху у дальшей роботи и живоце!           

                                                             Борис Кулеба

| назад |

школа нєшка | историят школи | колектив| конкурс | збуваня | мапа | линки