:: Ясна Папуґа

У фебруару того року Ясна Папуґова, школярка III₁ оддзелєня, нащивела Петницу, та нам пове дацо о тим як там було и цо ше робело.

Такой на початку, поведз нам же цо то Петница и дзе ше находзи?

- То виглєдовацки центер хтори ше находзи 6 km од Валєва, блїзко при єдней прекрасней пещери и озеру. Служи за усовершованє и преширйованє знаня школярох хтори заинтересовани зa одредзени обласци. Там иду дзеци зоз цалей Югославиї, а було школярох и зоз Македониї.

Цо це наведло же биш ше приявела?

- Поправдзе, за Петницу ме заинтересовал професор Медєши хтори преподава физику у керестурскей ґимназиї. Прешлого року сом дознала за тот центер, а вяри кед зме були на екскурзиї на Дивчибарох, зашли зме до Петници и там ше ми барз попачело. Прето сом того року конкуровала за одход до того центру.

Яки були условия за приєм?

- Перше ше пише есей на єдну од трох датих темох. Я писала есей на тему ,, Идея родзена``, потим ше пополнює формулар хтори доставаю шицки школяре котри сцу конкуровац. Пише ше кратка автобиоґрафия, предметни професор, оддзелєнски старшина и педаґоґ пишу свойо думанє о школярови. По моїм думаню, за приєм преовладую плани и жаданя хтори наведзени у автобиоґрафиї и професорово думанє, а нє предходни успихи на змаганьох и есей.

Чи ши обчековала таки успих?

- Вообще сом ше нє наздавала же ме виберу и же задоволїм їх критериюми. Думала сом же там иду лєм ,,НАЙ” школяре.

Прецо ши вибрала праве математику?

- Прето же любим математику, алє понеже математика и информатика були збити, вибрала сом тот напрям. Информатика ми нє представяла вельки проблем, бо зме мали лєм два преподаваня з тей обласци.

Зоз чого ше состояли преподаваня и чи требало вельо предходного знаня?

- Мали зме преподаваня хтори отримовали професоре з факултету. То ми було напарте, бо професоре лям ,,бербляли” и нє интересовало их чи ми дацо од того похопели. Дакеди нам викладали асистенти хтори ше баржей закладали за роботу. Зоз нїма зме робели задатки, розменьовали свойо идеї , цо було вельо интересантнєйше. Там ше нє роби нїч цо ми учиме у школи, були даєдни обласци зоз штвартого року, а шицко друге було зоз факултету и було ми цалком нєпознате.

Як ши звладала шицко тото?

- Нє думам же сом вельо научела, алє сом преширела свойо знанє, а преподаваня ми помогли же бим спознала велї ствари за хтори сом скорей анї нє чула.

Спомла ши розлику у викладаню професорох и асистентох, та нам поведз яке мали одношенє ґу вам, чи ше спущели на ваш уровень знаня?

- Професоре викладали як кед би ми були студенти, а асистенти ше баржей спущели на наш уровень. Направели добри увод и подробно нам шицко потолковали.

Поведз нам дацо о других напрямох!

- Попри математики и информатики були ище и други напрями, наприклад, физика-астрономия, електронїка, археолоґия. Школяре на тих напрямох мали вельо самостойней роботи. Физичаре мали вельо вежби, а археолоґове писали состави хтори на концу мушели викладац... Ми мали вельо преподаваня, а нїч самостойней роботи.

Чи сце мали досц шлєбодного часу и як ши го препровадзела?

- Преподаваня зме мали коло седем годзини дньово, так же зме мали надосц шлєбодного часу. Могли зме пойсц до сали дзе були компютери, до библиотеки, могли зме пойсц до пещери и на озеро. Найчастейше зме були при компютерох и там зме бавели рижни бависка, бо зме на интернету нє могли достац вязу.

Яке було дружтво?

- Добре. Нас на математики було двацец пецеро, дзешец дзивчата и петнац хлапци. Вельо зме ше дружели. Мала сом єдну барз добру пайташку, Весну зоз Македониї, вона ми була “цимерка”. Хлапци були дакус “префурани”, алє и вони ше дружели з нами. Побрала сом од даєдних адреси, алє нє знам чи им будзем писац. Кед дакеди пойдзем до Крушевцу або Беоґраду, та ше явим дакому отамаc.

Опиш нам амбиєнт, яки були хиґиєна и єдзенє!

- Єдзенє було добре. Хиґиєна була супер, шицко там барз чисте и крашнє отримоване. Петница ше состої зоз штирох обєктох. У єдним обєкту находза ше библиотека, компютерска сала и учальнї. У другим обєкту находзи ше кухня, потим єст єден обєкт за професорох и викладательох, а у єдним обєкту змесцени школяре.

Спомла ши пещеру и озеро, та нам поведз дацо о тим!

- Пещера ше ми барз пачела, мило ми же сом там була и видзела ю. Коло пещери шицко чисте и пошорене. Там ми було интересантно, лєм сом нє пошла глїбше до цмоти, була сом лєм покля видно. То ми бул найинтересантнєйше препровадзени шлєбоди час.

Чи ци ше там пачело и чи пребуванє у Петници задоволєло твойо обчекованя?

- Керестур ми нє хибел. Перши два днї ми були чежки, бо сом ше нє могла навикнуц же пополадню нє мож спац. Гей, то виполнєло мойо обчекованя, алє сом думала же будземе робиц вецей задатки.

Чи биш любела заш пойсц там?

- Гей , барз бим любела заш пойсц там.

Цо думаш, чи добре же постої таки центер и чом?

- Думам же барз добре же постої таки центер, прето же помага младим же би преширели свойо знанє.

Дзекуєме ци на тей розгварки и жадаме ци вельо успиху у витворйованю твоїх планох.

Ясмина и Ваня III₁

| назад |