Школяре и наставнїки нашей школи у перших дньох Нового року дожили вельку радосц, достали нєзвичайни дарунок. На адресу нашей школи сцигли три вельки пакети аж зоз далєкей Америки. Послала их dr Michele Parvensky. За нас вона донєдавна була цалком нєпозната особа. Дознала за нашу школу прейґ интернета, прейґ пана Ґабра Колєсара зоз Канади, родом з Руского Керестура и понеже знала же ту, у нас, чежка ситуация, ришела нам помогнуц. Помогнуц на тот способ же би збогацела нашу библиотеку и кабинети (до хторих пре познату ситуацию уж роками скоро нїч нове нє куповане), зоз велїма наставнима средствами, кнїжками, сликами, постерами, компакт дисками... Найчисленши прибори рижней файти за хемию (dr Parvensky професор хемиї), за физику, математику, та и за информатику.

Потребне видзиц тоту громаду хтора нєочкодована прешла таку драгу, та ше такой похопи же ше за тото вельке и племенїте дїло мушело уложиц вельо усиловносци, часу, та и пенєжи. Похопи ше же на тим швеце єст и добрих людзох хтори дзечнє помогню тим людзом хтори ше находза у нєволї у якей и ми тераз.

У тей хвильки, з нашого боку за тераз лєм єдно вельке – дзекуєме!

Dr Michele Parvensky

Професор хемиї у єдней досц елитней висшей школи The Pingry School у америцкей держави Ню Джерси. Бива у держави Пенсилваниї, у варошу Назарет. Кажди дзень путує на роботу до Ню Джерсию.

У роботи хаснує сучасни методи, пробує анимирoвац школярох зоз рижнима експериментами и зоз духовитим приступом ґу хемиї як науки.

Барз є активна у Карпато-Руским Дружтве у Америки, задлужена є за маркетинґ.

Окреме ма прихильносц ґу войводянским Руснацом понеже наш язик барз подобни язику котри хаснує єй оцец, и хасновали єй баби и дїдове кед ше приселєли до Америки. Детально виглєдує свойо коренї, як у Европи, у нєшкайшей Словацкей, так и Америки, у податкох о присельованю своїх предкох. У Европи, у цеку нащивох мож ю найсц медзи публику каждого векшого фестивала у Польскей, Словацкей або на Закарпатю.

Дарунок нашей школи нє єдини з єй боку. Наприклад, у акциї призберованя средствох за помоц у друкованю кнїжки "Руска ґимназия" дала 100 USD.

Нє одата є. Усвоєла єдну широтку, малого хлапца зоз индиянского племена Лакота. Зна го од 4 рокох, тераз му 13 роки. Йохо оцец погинул кед му було 7 роки а мац го охабела ище после родзеня, була алкоголичарка. Хлапец роснул зоз бабу, стару Индиянку. Панї Мишел Парвенски ше о нїм барз стара, купує му ствари, облєка го, плаци одредзени трошки школованя, приводзи до Назарету до нащиви, уплївує на ньго и трудзи ше же би одроснул у цо лєпших условийох...Аж и язик Лакота Индиянцох научела же би ше лєпше спорозумела зоз своїм сином по Богови. Вецей лєта робела як волонтер у резервату дзе Лакота Индиянци, дала на тисячи добродзечни годзини роботи, а водзела и студентох зоз Пинґри школи же би у пракси видзели живот у индиянским резервату и помогли кельо можу.

| назад |