Дакус вецей о нєшкайшей школи

Нєшка школа ноши назву Основна школа и ґимназия "Петро Кузмяк". Уж и сама назва гутори же ше орґанизацийно школа состої зоз двох (односно трох) цалосцох: обовязней основней и штреднєй школи – ґимназиї) цо єдинствене у нашей держави.

У основней єст 21 оддзелєнє од першей по осму класу зоз коло 400 школярами. Того школского (2007/2008) року до першей класи основней школи уписало ше 50 школярох. Шицки вони уж нащивйовали предшколски форми образованя хтори тиж присутни у валалє (яшєлька, ...). У осмей класи єст 51 школяр од хторих ше после законченя єдна часц упише до нашей ґимназиї. Окрем Керестурцох до рускей ґимнзаиї уписую ше и школяре з других местох нашей жеми.

Ґимназия общого напряму. У нєй ше настава одбува и на руским и на сербским язику. Того школского року до нєй уписано 51 школяр од чого 16 на руским (гоч єст места за 30 школярох) и 35 на сербским наставним язику. У каждей класи єст єдно руске и два сербски оддзелєня (то вєдно 208 школяре). Пре таку структуру тота ґимназия єдинствена у держави, а пре оддзелєня на руским наставним язику є єдина на швеце. Гоч ше наша ґимназия рахує до малих школох, за потерашнї XVI ґенерациї хтори закончели тоту школу мож повесц же ше школяре цалком успишно уписую далєй на висши школи и факултети.

У составе школи ше находзи и комфорни дом за школярох цо нє зоз валалу зоз 70 местами. Надалєй ту и сучасна кухня, фискултурна сала и спортски терени. Будинок ше находзи у центру валала, окружени зоз желєнїдлом – права школа у парку, з основним поглєдованьом и характеристику – роботносц и култура.

| назад |

школа нєшка | историят школи | колектив| конкурс | збуваня | мапа | линки